लोहारा (जि. धाराशिव):

27 जून 1999 रोजी उमरगा तालुक्याचे विभाजन करून लोहारा हा नवीन तालुका अस्तित्वात आला. आज लोहारा तालुक्यातील 45 गावांत सुमारे 1 लाख 60 हजार लोकसंख्या असून तब्बल 1 लाख 10 हजार मतदार आहेत. तालुका निर्मितीनंतर अनेक प्रशासकीय कार्यालये येथे आली असली तरी दळणवळणाच्या सुविधा मात्र आजही अपुऱ्या आहेत.

बसस्थानक असूनही बस डेपो नाही

जीवनराव गोरे एसटी महामंडळाचे अध्यक्ष असताना 85 लाख रुपये खर्च करून लोहारा बसस्थानक उभारले गेले. मात्र हे बसस्थानक लहान असल्याने प्रवाशांना आवश्यक सुविधा मिळत नाहीत. लोहारा तालुक्यात बस डेपो नसल्याने प्रवाशांना आजही उमरगा, तुळजापूर, अक्कलकोट आदी बाहेरच्या डिपोंवर अवलंबून राहावे लागते.

लोहाऱ्याचे दळणवळणातील महत्त्व

• लोहारा तालुका हा तुळजापूर आणि अक्कलकोट या तीर्थक्षेत्रांना जोडणारा दुवा आहे.
• शेजारीच लातूरसारखी मोठी बाजारपेठ असल्याने व्यापार, शिक्षण व उद्योगधंद्यांसाठी विद्यार्थ्यांची व व्यापाऱ्यांची मोठी वर्दळ कायम असते.
• महिलाही तुळजाभवानीच्या दर्शनासाठी मोठ्या संख्येने प्रवास करतात.
• ग्रामीण भागात अजूनही एसटी बससेवा हा मुख्य प्रवासाचा आधार आहे.

मात्र, योग्य बस डेपो नसल्याने लोहाऱ्यातील प्रवाशांना नेहमीच कुचंबना सहन करावी लागते.

चार एकर जागा उपलब्ध – डेपोची मागणी

सध्या लोहाऱ्यात प्रशस्त चार एकर जागा उपलब्ध असून येथे किमान 50 बसेसची सोय असलेला डेपो उभारला तर प्रवाशांना मोठा दिलासा मिळेल. यामुळे ग्रामीण भागातील महिला, विद्यार्थी व व्यापारी यांचा प्रवास सोयीस्कर व सुरक्षित होईल.

नागरिकांची जोरदार मागणी

लोहारा बसस्थानक लहान व अपुऱ्या असल्याने लोहारा बस डेपो उभारण्याची मागणी दिवसेंदिवस जोर धरत आहे. प्रवासी व नागरिकांचे मत आहे की परिवहन मंत्री तथा जिल्ह्याचे पालकमंत्री प्रताप सरनाईक यांनी तातडीने लक्ष घालून डेपो उभारावा.

प्रतिक्रिया – अनिल जगताप (माजी विभागीय सल्लागार समिती सदस्य, राज्य परिवहन महामंडळ)

दळणवळणाच्या दृष्टीने लोहारा तालुका अत्यंत महत्त्वाचा आहे. अक्कलकोट–तुळजापूर तीर्थक्षेत्र जोडणारा हा तालुका असल्याने येथे नवीन बस डेपो उभारून प्रवाशांना उत्तम सेवा द्यावी. ग्रामीण भागातील महिला, विद्यार्थी, व्यापारी आजही मोठ्या प्रमाणात एसटी बसवर अवलंबून आहेत. त्यामुळे लोहारा बस डेपो उभारणे ही काळाची गरज आहे.